Jehonat e brezit Beat përshkruajnë të gjitha format e tjera alternative të kundërkulturës që po lindte pas Luftës së Dytë Botërore – hipitë, artistët “progresivë”, më tej ekstremistët e punk-ut e deri te hip-hop. Brezi Beat mund të shihet si nënkultura e parë, madje në gjithë kulturën perëndimore.
Së brendshmi, historia e rock-ut ka një cilësi mistike, sepse flet për diskriminimin racial dhe “përleshjen” që po ndodhte midis dy rrymave – stilit afro-amerikan dhe muzikës së të bardhëve në Amerikën e viteve ’50. Me gjithë rezistencën negative të të bardhëve për invazionin e kulturës së “zezë”, nuancat e muzikës afro-amerikane, të cilat kishin rrënjë më të thella shpirtërore, po dominonin në periudhën para-rock të pasluftës. Shumë të bardhë filluan ta admironin këtë muzikë të re, pavarësisht nga diskriminimi social që shoqëronte “muzikën racore”.
Nga gjiri i të bardhëve doli një rrymë që përqafoi aktin e krijimit të rock-ut, e që ecte paralel me atë burimoren. Ky brez lindi si një ndasi midis dy brezave, si protestë apo rebelim i adoleshentëve ndaj prindërve të tyre, të cilët preferonin të dëgjonin stilin e dalë mode Tin Pan Alley, në dallim nga të rinjtë që ishin të joshur nga muzika racore e mbarsur me nota ndjellëse seksuale dhe çlirimtare të qenësishme. Rock’n’roll-i i viteve ’50 do ta ndryshonte muzikën folk (popullore) përgjithmonë. Në mars të vitit 1952, Alan Freed nga Kleveland-i dha koncertin e parë të rock’n’roll-it, ku audienca përbëhej nga një përzierje racash. Në fund të dhjetëvjeçarit që pasoi, rock-u ishte përhapur në mbarë botën, deri në Australinë e largët. Ishte po Alan Freed që e emërtoi rock’n’roll, për të përshkruar më mirë muzikën “argëtuese” rhythm & blues të të zinjve.
Termi rock’n’roll është i gjerë, me kufij të shtrirë, shpesh të papërcaktuar – nga shtrati zanafillor kanë dalë shumë rryma bijëza: muzika soul, heavy metal, punk-u, rock-u progresiv, rock-u alternativ, rock-u klasik, rock-u instrumental, madje dhe hip-hop.
Shkëputur nga libri “Rock’n’roll, Muzikë, Liri dhe Poezi”, përzgjedhur dhe përkthyer nga Genci Muçollari, Albas, 2023
@gencimucollari
@albaspublishinghouse
