Picasso ka përdorur ngjyra të ndezura, duke përfshirë të
verdhën dhe të gjelbrën, për të paraqitur një nudo të Walter, e dashura dhe
muza e tij, duke fjetur në një karrige me një libër në prehrin e saj. Disa
kritikë kanë thënë se, libri në prehrin e Walter-it është një “simbol seksual”
dhe piktura është përshkruar si sensuale, erotike dhe e lumtur. Për pikturën
dhe Picasso-n, Philip Hook nga Sotheby ka thënë “Në fillim të viteve 1930, ai
ishte shumë lirik në dashuri dhe reflektonte këtë në këto ngjyra të
mrekullueshme dhe kompozime të dashura. Kjo periudhë është më e dëshirueshmja
nga të gjitha periudhat e Picasso-s, padyshim në termat e tregut.” Duke qenë se,
Picasso e pikturoi “Leximtaren” vetëm disa ditë nga “Le Reve” (Ëndrra), të dyja
pikturat janë shumë të ngjashme në kompozim.
Picasso u takua me Marie-Thérèse Walter në vitin 1927
teksa ajo po dilte nga Metroja e Parisit dhe më vonë ata filluan një marrëdhënie,
të cilën e mbajtën të fshehtë sepse ajo ishte vëtëm shtatëmbëdhjetë vjeç dhe Picasso
ishte i martuar me Olga Khokhlova. Deri në çastin kur ai pikturoi “Leximtaren”,
Picasso shpesh i përfshinte disa nga tiparet e Walter-it në sfondet e veprave të
tij të tjera. Kur “Leximtarja” u ekspozua në retrospektivën e Picasso-s, Khokhlova
e kuptoi që bashkëshorti i saj ishte në një marrëdhënie me një grua tjetër pasi
vuri re tiparet e fytyrës në pikturë nuk ishin të sajat. Ajo e përfundoi martesën
me Picasso-n shumë shpejt pas kësaj. Më vonë Walter-i ka frymëzuar vepra të
tjera të Picasso-s, duke përfshirë “Le Reve” (Ëndrra), të cilën Picasso e
pikturoi në të njëjtën muaj si ‘Leximtarja”, dhe “Nudo, Gjethe të Gjelbra dhe
Bust”. Me influencën e Walter-it mbi Picasso-n dhe veprën e tij, Ujku i Artit (Art
Wolf) ka thënë se “Përzierja e fuqishme e tërheqjes fizike dhe naivitetit
seksual të Marie-Thérès kishte një efekt dehës tek Picasso, dhe dëshira e tij e
rrëmbyer për të prodhoi një sërë imazhesh që janë midis atyre më të kërkuarave
nga karriera e tij e gjatë.”
Përzgjodhi dhe përktheu Enkeleda Suti.
