Jo, dashuria nuk ka vdekur në këtë zemër, në këto sy dhe në këtë gojë
Që ka shpallur fillimin e funeralit të vetes.
Dëgjo, jam ngopur me piktoresken, me shumëngjyrëshen, dhe me hijeshinë.
Unë dashuroj dashurinë, ëmbëlsinë dhe mizorinë e saj.
Dashuria ime ka vetëm një emër, një formë.
Çdo gjë zhduket. Të gjitha gojët kapen vetëm pas asaj një.
Dashuria ime ka vetëm një emër, një formë.
Dhe nëse një ditë ti do të kujtosh
O ti, formë dhe emër i dashurisë sime,
Një ditë në oqeanin ndërmjet Amerikës dhe Evropës,
Në orën kur do të shkëndijë rrezja e fundit e dritës
Mbi sipërfaqen e valëzuar të dallgëve, apo të një nate të stuhishme
Poshtë një peme në fshat apo në një makinë garash,
Një mëngjes pranvere mbi bulevardin Malesherbes,
Një ditë me shi,
Përpara se të shrtihesh në muzg,
Thuaji vetes – Unë e urdhëroj shpirtin tënd të njohur që
Unë vetëm të kam dashur më shumë dhe sa keq që ti nuk e dije.
Thuaji vetes se nuk ka nevojë që të pendohesh: Ronsard-i dhe
Baudelaire-i përpara meje i kanë kënduar dhimbjes
Së grave të plakura apo të vdekura, të cilët e përbuzën ndjekjen e dashurisë.
Kur të vdesësh
Ti ende do të jesh e dashur dhe e dëshirueshme.
Unë tashmë do të kem vdekur, plotësisht i mbyllur në trupin tënd të pavdekshëm,
Në imazhin tënd magjepsës përgjithmonë aty midis mrekullive të pafundme
Të jetës dhe të pafundësisë, por nëse do të jem gjallë,
Tingulli i zërit tënd, vështrimi yt rrezatues,
Aroma e aromës së flokëve të tu dhe shumë gjëra të tjera
Do të jetojnë brenda meje.
Tek unë dhe unë nuk jam as Ronsard-i dhe as Baudelaire-i
Unë jam Robert Desnos i cili, sepse të njoha dhe të desha ty,
Është aq mirë saç është.
Unë jam Robert Desnos që kërkon të kujtohet
Mbi këtë tokë të poshtër për asgjë veç kësaj dashurie.
Jo, dashuria nuk ka vdekur nga Robert Desnos
Përzgjodhi dhe përktheu Enkeleda Suti
Piktura, Ana tjeter, 1918, Dean Cornwell
#art #poetry #robertdesnos #enkeledasuti #painting #deancornwell
