Njeriu e ka kthyer mendjen e tij drejt përsosjes gjithnjë
edhe më shumë të teknologjisë – kompjuterave, instrumenteve më të mira lufte, komunikimit
më të mirë, mjeteve më të mira për të vrarë një qenie tjetër njerëzore, dhe kështu
me rradhë. Vetëdija e tij (e njeriut) ka lëvizur drejt një teknologjie më të
madhe. Ai i ka dhënë energjitë e tij në këtë drejtim. Trutë tanë po bëhen
gjithnjë edhe më shumë mendje teknologjike, si vegla. Ne nuk po themi që ju nuk
duhet ti keni ato, ne po themi që kjo është e pashmangshme, ja kjo është ajo që
ka ndodhur. Dhe njeriu i ka dhënë shumë pak kohë, energji, mendim, çdo drejtimi tjetër. Ai nuk thotë: Do të
zbuloj vetë se çfarë jam unë, përse sillem kështu, çfarë ekziston përtej gjithë
kësaj? Ne nuk i kemi dhënë energjinë, kohën, ose gjallërinë e barabartë që të kërkojmë
brenda vetes sonë se çfarë jemi. A ekziston ndonjë gjë që është përfundimtare, përtej
të gjitha vuajtjeve? A ka ndonjë ekzistencë pa shkak? Kërkimi për diçka shumë më
të madhe se sa e gjithë teknologjia, i gjithë mendimi njerëzor. A e shikoni
peisazhin? Jo në kundërshtim me të, dhe as si reagim kundër tij, por njeriu nuk
mund të jetojë vetëm me teknologjinë, dhe me produktet e tij. Njeriu duhet të
shkojë tek ajo që është e pamatshme. Ju lutem, shikoni se sa aktuale është e
gjitha kjo. Le të supozojmë se, ju do t’ia kushtoni energjinë, kohën, dhe kapacitetin
tuaj, kërkimit të vërtetë, duke mos pranuar besimin dhe të gjitha ato gjërat fëminore,
por të kërkoni në thellësinë tuaj. Kërkimi është i ndryshëm nga analiza. Të kërkosh
do të thotë të vëzhgosh dhe ta ndjekësh atë vëzhgim. Kështu, kur një qenie njerëzore
e bën këtë, në atë çast ju do të jeni duke i shtuar të gjithë vetëdijes njerëzore
një lloj cilësie. Dhe nëse do të kemi njëmijë njerëz që janë të shqetësuar mbi
këtë gjë, jo duke formuar një grup dhe të gjitha këto gjërat qesharake, por në
fakt t’ia kushtoni të gjithë jetën tuaj pikërisht kësaj gjëje, atëherë ju do të
jeni duke i shtuar vetëdijes njerëzore një cilësi që i kapërcen të gjitha fjalët,
që shkon përtej të gjitha mendimeve, përtej të gjitha konkluzioneve, drejt diçkaje
që është e përjetshme.
Burimi: https://www.youtube.com/watch?time_continue=24&v=DesKPegqbpA
Përzgjodhi dhe përktheu nga anglishtja – Enkeleda Suti
