Të pamatshmet
Pasqyra e marrëdhënieve
Nga Krishnamurati
Unë mendoj se, ne jemi të prirur që të harrojmë se shoqëria jonë, kultura në të cilën ne jetojmë, dhe ku jemi rritur dhe edukuar, dhe që na ka kushtëzuar, është rezultat i orëvatjeve njerëzore, konflikteve njerëzore, mjerimit njerëzor dhe vuajtjes. Edhe ne gjithashtu: kultura, individi dhe komuniteti është secili prej nesh. Ne nuk jemi të ndarë prej tyre. Për ta ndjerë këtë, jo si një ide apo si njv koncept intelektual, por në fakt të ndjesh realitetin e saj, ne duhet të ndjekim pyetjen se çfarë është një marrëdhënie? Sepse jeta dhe ekzistenca jonë bazohen tek marrëdhëniet. Jeta është një lëvizje në marrëdhënie. Dhe nëse ne nuk e kuptojmë se çfarë nënkuptohet me marrëdhënie, në mënyrë të pashmangshme ne jo vetëm që izolojmë vetveten, por krijojmë një shoqëtri në të cilën qeniet njërëzore janë të ndara, jo vetëm mbi baza kombëtare, fetare, por gjithashtu edhe në vetvete dhe rrjedhimisht, duke projektuar atë që ata janë në botën e jashtme. Nuk e di nëse ju keni shkuar thellë brenda kësaj pyetjeje, për të zbuluar nëse mund të jetojmë me dike tjetër në harmoni të plotë, në një akordim të plotë, që të mos ketë asnjë pengesë, asnjë ndarje, por një ndjesi uniteti të plotë. Sepse marrëdhënie do të thotë të jesh i lidhur – jo në veprim, jo në të njëjtin projekt, jo në një ideologji apo koncept – por të jeni tërësisht të bashkuar në ndjesinë se ndarja, fragmentarzimi ndërmjet individëve, ndërmjet dy qenieve njerëzore, nuk ekziston fare në asnjë nivel.
Përzgjodhi dhe përktheu nga anglishtja – Enkeleda Suti